༈ མཚུངས་མེད་ཤར་རྩེ་ཆོས་རྗེ་རིན་པོ་ཆེ༧རྗེ་བཙུན་བློ་བཟང་རྡོ་རྗེ་མཆོག་གི་ཁྲི་སྟོན་མཛད་སྒོ་དང་འབྲེལ་བའི་མཛད་རིམ་ཁག

2/20/2017 LosellingMonastery མཆན་ 0 སྡེ་ཚན་ :





















          ༧སྤྱི་ནོར༸གོང་ས་༸སྐྱབས་མགོན་ཆེན་པོ་མཆོག་གིས་ཤར་པ་ཆོས་རྗེ༧རྗེ་བཙུན་བློ་བཟང་བསྟན་འཛིན་མཆོག་དགའ་ལྡན་ཁྲི་ཐོག་ ༡༠༣ པར་བསྐོ་གཞག་མཛད་པའི་ཚབ་ཏུ་བྱེས་ཀྱི་གདན་ས་དཔལ་ལྡན་འབྲས་སྤུངས་བློ་གསལ་གླིང་ཚུལ་ཁང་ཁང་ཚན་གྱི་རྒྱུད་སྟོད་མཁན་ཟུར་བློ་བཟང་རྡོ་རྗེ་མཆོག༢༠༡༦ཟླབ ༡༢ ཚེས་ ༡༧ ཉིན་ཤར་པ་ཆོས་རྗེར་བསྐོ་གཞག་མཛད་པའི་བཀའ་ཡིག་བསྩལ་བ་ལྟར། ཟླ་ ༡༢ ཚེས་ ༢༣ སྟེ་དགའ་ལྡན་ལྔ་མཆོད་ཀྱི་དུས་ཁྱད་ཉིན་མོར་ཤར་པ་ཆོས་རྗེ་མཆོག་གདན་ས་དགའ་ལྡན་དུ་༸གོང་ས་༸སྐྱབས་མགོན་ཆེན་པོ་མཆོག་ལ་ཤར་པ་ཆོས་རྗེའི་མཛད་འགན་བཞེས་པའི་གསར་མཇལ་སོགས་ཞུས་གནང་ཡོད།  ༢༠༡༧ལོའི་ཟླ་བ་ ༢ ཚེས ༡༩ ཉིན་ཤར་པ་ཆོས་རྗེ་༧རྗེ་བཙུན་བློ་བཟང་རྡོ་རྗེ་མཆོག་༧ རྗེ་ཙོང་ཁ་པ་ཆེན་པོའི་གདན་ས་དགའ་ལྡན་རྣམ་པར་རྒྱལ་བའི་གླིང་དུ་ཆིབས་ཐོན་གནང་སྟེ་དགའ་ལྡན་བླ་སྤྱི་དང་། ཤར་རྩེ་གྲྭ་ཚང་། ཕུ་ཁང་ཁམས་ཚན་བཅས་ནས་ཕེབས་བསུ་མཛད་སྒོ་གནང་བ་དང་། ཕྱི་ཉིན་དགའ་ལྡན་ཚོགས་ཆེན་དུ་མཁས་མང་འདུས་པ་རྒྱ་མཚོ་ཚོགས་འཚོགས་པའི་དབུས་སུ་སྤྱན་རྒྱ་སྤོས་སྣེ་དང་གདན་ཞུས་གནང་སྟེ་སྐུ་ཕྱག་གྲུབ་མཚམས་ཐུགས་སྨོན་དང་འབྲེལ་བའི་ཐོར་ནས་གཏོར་བ་དང་། རྟེན་གསུམ་ཁག་ལ་སྙན་ཤལ། དཀར་མེ་ཞལ་ཕྱེ། གནས་གཟིགས་གྲུབ་རྗེས་བཞུགས་ཁྲིར་འཁོད། དེ་ནས་གསོལ་ཇ་འབྲས་སིལ་འདེགས་འབུལ་དང་། བླ་སྤྱིའི་ལས་སྣེ་ཚོས་མཎྜལ་རྟེན་གསུམ་འདེགས་འབུལ་དང་མཇལ་ཞུ་སོགས་བྱས། དེ་ནས་ཤར་རྩེ་ཆོས་རའི་འདུས་མང་ལ་གསུང་ཆོས་སོགས་ལེགས་པར་གྲུབ་རྗེས། དེ་ནས་དཔལ་ལྡན་འབྲས་དཀར་སྤུངས་པའི་གླིང་དུ་ཆིབས་ཞལ་བསྒྱུར་ཏེ་མཁས་མང་བློ་གསལ་གླིང་འདུས་མང་གིས་སེར་སྦྲེང་གི་ཐོག་ནས་ཕེབས་བསུ་དང་། གཙུག་ལག་འདུ་ཁང་ནང་ཕེབས་པར་གྲུབ་མཚམས་མཎྜལ་རྟེན་གསུམ་འདེགས་འབུལ་དང་འབྲས་སིལ་སོགས་འབུལ་བར་བྱས་ཏེ་བཀྲ་ཤིས་དབྱངས་ཀྱི་མཆོད་སྤྲིན་དཀྲིགས། དེ་ནས་འབྲས་བློ་གླིང་ཚུལ་ཁང་ཁམས་ཚན་དུ་ཆིབས་བསྒྱུར་གྱིས་སྤོས་སྣེ་མཇལ་དར་གྱིས་ཕེབས་བསུ་ཞུས་ཏེ་བཞུགས་ཁྲི་ལ་འཁོད་མཚམས། དབུ་མཛད་ཀྱིས་བཀྲ་ཤིས་པའི་ཚིགས་བཟང་དང་ཞབས་བརྟན་ཁག་བཅས་དབུ་སྐུལ་གནང་ན་དང་། གསོལ་ཇ་འབྲས་སིལ་སོགས་འདེགས་འབུས་བྱས། འབྲས་བླ་སྤྱི་དང་གྲྭ་ཚང་ཁམས་ཚན་ཁག་དང་འབྲེལ་ཡོད་ཁག་གཅིག་ནས་ཎྜལ་རྟེན་གསུམ་འདེགས་འབུལ་དང་གྲྭ་མང་གིས་མཇལ་དར་སོགས་འབུལ་བར་བྱས་ཏེ་མཛད་སྒོ་གྲོལ།
           འབྲས་སྤུངས་བློ་གསལ་གླིང་ཤར་པ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་མཆོག་ནི་
ད་ལྟ་དགུང་གྲངས་ ༨༠ ལ་ཕེབས་ཡོད་པ་དང་། མདོ་ཁམས་ཚ་ལྷོ་རྫོང་དུ་ཡབ་ཚེ་འཕེལ་དང་ཡུམ་ཚེ་ལྷ་གཉིས་ཀྱི་སྲས་སུ་སྐུ་འཁྲུངས།  དགུང་ལོ་ལྔ་དྲུག་ཙམ་བར་སྐྱེས་མས་གཅེས་སྐྱོང་གནང་བ་དང་ཆུང་དུས་ཁྱིམ་ཚང་གིི་ཕྲུ་གུའི་ནང་ནས་ཡི་གེ་སྦྱོར་ཀློག་ཐོག་བཟང་ཤོས་དེ་ཡིན། ཡབ་ཡུམ་གཉིས་ཀྱིས་ཐོག་མར་ཁྱིམ་ཐབས་སུ་སྦྱར་འདོད་གནང་ཡང་ཤར་པ་ཆོས་རྗེ་མཆོག་ནས་རབ་ཏུ་བྱུང་འདོད་ཁོ་ན་གནང་བར་བརྟེན་དགུང་ལོ་  ༡༦ ཐོག་ཁྱིམ་ནས་བྲོས་ཏེ་ཟླ་བ་གཉིས་ཙམ་རིང་བོད་ཀྱི་རྒྱལ་ས་ལྷ་ས་བར་སློང་མོ་རྒྱག་བཞིན་དུ་ཞབས་ཐང་ལ་ཕེབས་པ་དང་། དེ་རྗེས་གདན་ས་ཆེན་པོ་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་དུ་སྒྲིག་ཞུགས་གནང་ནས་དགེ་བའི་བཤེས་གཉེན་དུ་མའི་དྲུང་ནས་གཞུང་ཆེན་བཀའ་པོད་ལྔའི་ཐོག་བསླབ་པ་སློབ་གཉེར་མཐིལ་ཕྱིན་མཛད་འདུག སྤྱི་ལོ་ ༡༩༨༥ ལོར་དགེ་བཤེས་ལྷ་རམས་པ་ཨང་དང་པོའི་མཚན་རྟགས་བཞེས་གནང་འདུག་དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དགོངས་ལྟར་དཔལ་ལྡན་རྒྱུད་སྟོད་གྲྭ་ཚང་དུ་སྒྲིག་ཞུགས་དང་འབྲེལ་སྔགས་ཀྱི་དམ་བཅའ་འཇོག་གནང་པ་མ་ཟད། སྔ་རྗེས་རྒྱུད་སྟོད་གྲྭ་ཚང་གི་དགེ་བསྐོས་དང་བླ་མ་དབུ་མཛད།  མཁན་པོ་བཅས་གནང་ཡོད་པ་རེད། ༸གོང་ས་མཆོག་གི་བཀའ་དགོངས་བཞིན་འཇིགས་བྱེད་ཀྱི་བསྙེན་ཆེན་དང་ཡི་དམ་མང་པོའི་བསྙེན་པ་བཏང་གནང་བ་དང་། གདན་སའི་དགེ་བཤེས་རྣམས་ལ་སྔགསགཞུང་གི་བཤད་ཁྲིད་ཀྱང་གནང་། འབྲས་སྤུངས་ལ་ཕེབས་ནས་སློབ་མ་བརྒྱ་ཕྲག་མང་པོར་གཞུང་ཆེན་བཀའ་པོད་ལྔའི་རྩ་བ་ཁག་གི་བཤད་ལུང་དང་། བཤད་ཁྲིད།  དེ་བཞིན་གསང་སྔགས་གཞུང་གི་ཟབ་ཁྲིད་སོགས་གནང་ནས་སྐུ་ཚེ་གང་པོར་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་ཐད་ཞབས་འདེགས་ཞུས་དང་ཞུ་མུས་ཡིན་པ་རེད། ཟླ་བ་འདིའི་ཚེས་ ༡༧ ༸གོང་ས་༸སྐྱབས་མགོན་ཆེན་པོ་མཆོག་གིས་ཤར་པ་ཆོས་རྗེར་བསྐོ་གཞག་མཛད་པའི་བཀའ་ཡིག་བསྩལ་དོན་ལྟར། ཤར་པ་ཆོས་རྗེའི་མཛད་འགན་བཞེས་གནང་བཞིན་ཡོད་པ་དང་། ༢༠༡༧ ཟླ་བ ༢ ཚེས་༡༩ དང་ ༢༠ ལ་ཤར་པ་ཆོས་རྗེའི་ཁྲི་སྟོན་མངའ་གསོལ་གྱི་མཛད་སྒོ་དངོས་སུ་ཚོགས་ཡོད་པ་རེད།



རྩོམ་ཡིག་གཞན།

མཆན་ 0