རིགས་དང་དཀྱིལ་འཁོར་རྒྱ་མཚོའི་མངའ་བདག་༧གོང་ས་རྒྱལ་དབང་ཐམས་ཅད་མཁྱེན་པའི་རིགས་ཀྱི་ཅོད་པན་༧སྐྱབས་རྗེ་ཡོངས་གླིང་མཆོག་སྤྲུལ་རིན་པོ་ཆེའི་དགེ་བཤེས་གཏོང་སྒོའི་མཚན་རྟགས་བཞེས་པ་དང་འབྲེལ་བའི་མཛད་སྒོ་ཁག་གི་གནས་ཚུལ་རགས་བསྡུས།

11/22/2016 LosellingMonastery མཆན་ 0 སྡེ་ཚན་ :










































 ༢༠༡༦།༡༡།༢༡ བོད་ཟླ་༩ ཚེས་༢༢ རྒྱལ་བ་ལྷ་ལས་བབས་པའི་དུས་ཆེན་ཁྱད་པར་ཅན་གྱི་ཉིན་མོ་དང་། དཔལ་ལྡན་འབྲས་སྤུངས་ཕྱག་བཏབ་ནས་མི་ལོ་༦༠༠།འཁོར་བའི་མ་སྒྲིག་ལྷུན་གྱིས་གྲུབ་པའི་དུས་ཆེན་ཁྱད་པར་ཅན་འདི་ལ་རིགས་དང་དཀྱིལ་འཁོར་རྒྱ་མཚོའི་མངའ་བདག་༧གོང་ས༧རྒྱལ་དབང་ཐམས་ཅད་མཁྱེན་པའི་རིགས་ཀྱི་ཅོད་པན༧རྒྱལ་བའི་ཡོངས་འཛིན་གླིང་མཆོག་སྤྲུལ་རྡོ་རྗེ་འཆང་བསྟན་འཛིན་ལུང་རྟོགས་འཕྲིན་ལས་ཆོས་འཕགས་མཆོག་གིས་དཔལ་ལྡན་འབྲས་དཀར་སྤུངས་པའི་ཡ་གྱལ་མཁས་མང་བློ་གསལ་བྱེ་བའི་གླིང་དུ་བགྲང་བྱ་ཧྲིལ་པོ་ཉི་ཤུ་ལྷག་གཞུང་ཆེན་བཀའ་པོད་ལྔ་ལ་གསན་བསམ་མཛད་པའི་འབྲས་རྟགས་སུ་དགེ་བཤེས་ཀྱི་མཚན་གནས་བཞེས་པའི་དུས་བཟང་ཞིག་ཀྱང་ཡིན། དེ་ཡང་སྔ་དྲོར་འབྲས་སྤུངས་ཚོགས་ཆེན་དུ་དགེ་འདུན་པ་རྣམས་འཛོམས་ཏེ་མང་ཇ་ཚོགས་རྗེས་དགའ་ལྡན་ཕོ་བྲང་གི་སྐུ་ཚབ།  ཆོས་དོན་བཀའ་བློན་མཆོག འབྲས་སྤུངས་ཚོགས་ཆེན་ཁྲི་པ་རིན་པོ་ཆེ། རྣམ་གྲྭ་མཁན་རིན་པོ་ཆེ། མཆོག་སྤྲུལ་རིན་པོ་ཆེའི་ཡོངས་འཛིན།  གནས་ཆུང་སྐུ་བསྟེན། ཀོ་རི་ཡ་མཁན་རིན་པོ་ཆེ། གྲྭ་ཚང་ཁག་གི་མཁན་ལས་ཟུར། ཡོངས་འཛིན་གླིང་ཚང་གི་ཕྱག་མཛོད། ཕྱོགས་ཕེབས་ཀྱི་འབྲེལ་ཡོད་བླ་སྤྲུལ་དང་སྦྱིན་བདག་ཁག འབྲས་སྤུངས་ཚོགས་ཆེན་ཞལ་ངོ་རྒན་ཞོན་སོགས་ཀྱིས་འབྲས་སྤུངས་ཚོགས་ཆེན་ཡང་སྟེང་དགའ་ལྡན་ཕོ་བྲང་ནས༧གོང་ས་མཆོག་གི་སྐུ་དཔར་མཐོང་གྲོལ་རིན་པོ་ཆེ་རོལ་མོ་དུང་དང་སྤོས་སྣེས་བསུས་ཏེ་གདན་དྲངས་ནས་ཚོགས་ཆེན་ལ་སྐོར་བ་ཞིག་སྐྱོན་ཏེ་འདུ་ཁང་གི་སྒོ་ཆེན་ནས་གདོང་གྲལ་དཀྱིལ་ནས་ཕེབས་ཏེ་༧རྒྱལ་བའི་ཁྲི་ལ་བཞུགས་སུ་གསོལ་བ་དང་མཎྜལ་རྟེན་གསུམ་འདེགས་འབུལ་ཀྱིས་ཁྲི་ལ་བཞུགས་སུ་གསོལ་བ་དང་།
ཚོགས་དབུས་སུ་མང་ཇ་དང་སྐུ་འགྱེད་ཧིན་སྒོར་༥༠༠ རེ་དང་མཇལ་དརབཅས་ཀྱི་བསྙེན་བཀུར་རྒྱ་ཆེར་གྱ་ནོམ་པར་བྱས། ཕྱག་ཚོད་དགུ་པའི་ཐོག་མཁས་མང་བློ་གསལ་བྱེ་བའི་གླིང་གྲྭ་ཚང་དུ་སྐྱབས་རྗེ་མཁན་རིན་པོ་ཆེ་དབུ་བཞུགས་ཐོག་འདུས་མང་སྟོང་ཚོ་བརྒལ་བའི་དབུས་སུ་དམ་འཇོག་མཛད་དེ་མཁས་པ་མགུ་བ་བསྐྱེད་པའི་ལེགས་སྐྱེས་ཀྱིས་མཆོད་སྤྲིན་བསྟར། ཉིན་གུང་མཁས་མང་བློ་གསལ་བྱེ་བའི་གླིང་གི་འདུས་མང་ཡོངས་ལ་ཚོགས་དབུས་སུ་ཉིན་གུང་བཞེས་ལག་དང་དགེ་འདུན་རེ་ལ་སྐུ་འགྱེད་ཧིན་སྒོར་༡༥༠༠། རེ་འབུལ་ལམ་ཞུས་ཏེ་ཐུགས་སྨོན་མཚམས་སྦྱོར་རྒྱ་ཆེར་མཛད། དེའི་ཕྱི་ཉིན་མཁས་མང་བློ་གསལ་བྱེ་བའི་གླིང་གྲྭ་ཚང་གིས་གསོལ་བ་ཕུར་ཚུགས་འདེབས་པ་བཞིན་ཕྱག་ཚོད་བདུན་པའི་ཐོག་དབུ་བཞུགས་འཇམ་མགོན་རྒྱལ་བའི་གདུང་འཚོབ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དང་།  རང་གཞུང་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས།  དཔལ་ལྡན་དགའ་ལྡན་ཕོ་བྲང་གི་དྲུང་ཡིག་ཆེན་མོ་བློ་བཟང་སྦྱིན་པ།  འབྲས་སྤུངས་ཚོགས་ཆེན་ཁྲི་པ་རིན་པོ་ཆེ། རྣམ་གྲྭ་མཁན་རིན་པོ་ཆེ། གདན་ས་གསུམ་དང་རྒྱུད་གྲྭ་སྟོད་སྨད། བཀྲ་ཤིས་ལྷུན་པོ། ར་བ་སྟོད་པ་བཅས་ཀྱི་མཁན་ལས་ཟུར་དང་། གྲྭ་ཚང་ཁག་གི་སྐུ་ཚབ། ས་གནས་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་འཐུས་མི། འདུས་མང་ཡོངས་ནས་མདོ་ལུགས་དང་འབྲེལ་བའི་བརྟན་བཞུགས་གཟབ་རྒྱས་ཤིག་ཀྱང་འབུལ། དེ་ནས་དགའ་ལྡན་ཁྲི་ཆེན་རྡོ་རྗེ་འཆང་དབུ་བཞུགས་ཐོག་སྐྱབས་རྗེ་གླིང་མཆོག་སྤྲུལ་རིན་པོ་ཆེས་བགྲང་བྱ་ཉི་ཤུ་ལྷག་རིང་གཞུང་ཆེན་བཀའ་པོད་ལྔ་ལ་གསན་བསམ་རྒྱ་ཆེར་གནང་བའི་འབྲས་རྟགས་སུ་གྲྭ་ཚང་གིས་དགེ་བཤེས་མཚན་གནས་ཀྱི་ཕྱག་ཁྱེར་གཟེངས་བསྟོད་དང་། དགའ་ལྡན་ཕོ་བྲང་གི་སྐུ་ཚབ་མི་རྗེ་སྐུ་ངོ་བློ་བཟང་སྦྱིན་པ་མཆོག་ནས་༧གོང་ས་༧རྒྱལ་དབང་ཐམས་ཅད་མཁྱེན་པ་མཆོག་གིས་གནང་བའི་ལེགས་སྐྱེས་མཇལ་དར། བློ་གླིང་སྤྲུལ་སྐུ་ལྷན་ཚོགས་ནས་གཟེངས་བསྟོད་རིན་ཆེན་དང་གཉིས་ལས་གྲུབ་པའི་འཁོར་ལོ་སོགས་ཀྱིས་གཟེངས་བསྟོད་གྱ་ནོམ་པ་འབུལ་བའི་ཐོག དགའ་ལྡན་ཁྲི་ཆེན་རྡོ་རྗེ་འཆང་། གྲྭ་ཚང་གི་མཁན་རིན་པོ་ཆེ་མཆོག །མི་རྗེ་ཆོས་དོན་བཀའ་བློན། དགའ་ལྡན་ཕོ་བྲང་གི་སྐུ་ཚབ་བཅས་ཀྱི་དགེ་བཤེས་མཚན་རྟགས་དང་འབྲེལ་གསུང་བཤད་རྒྱ་ཆེར་གནང་གྲུབ་རྗེས། སྐུ་མགྲོན་རྣམས་ཀྱིས་མཎྜལ་རྟེན་གསུམ་འདེགས་འབུལ་དང་མཇལ་དར་སོགས་རིམ་སྒྲོན་ཞུས། དེ་ནས་ཉིན་གུང་སྐུ་མགྲོན་རྣམས་དང་གྲྭ་ཚང་གི་ལས་བྱེད་མཆིས་སོ་ཅོག་ལ་གསོལ་ཚིགས་འབུལ་བ་བྱས་ཏེ་མཛད་སྒོ་གྲོལ། མདོར་ན་དེ་ཡི་རིང་མཁས་མང་བློ་གསལ་བྱེ་བའི་གླིང་གྲྭ་ཚང་དང་༧ ཡོངས་གླིང་ཚང་བླ་བྲང་ཟུང་འབྲེལ་གྱིས་བྱ་བ་མཐའ་དག་གེགས་མེད་ལམ་ལྷོང་དང་། ས་གནས་གཞུང་དང་གཞུང་འབྲེལ་མིན་པའི་ཚོགས་སྡེ་སོ་སོའི་འཐུས་མི་བཅས་སེར་སྐྱ་སྟོང་ཕྲག་ལས་བརྒལ་བ་འདུ་འཛོམས་ཀྱིས་དམ་པའི་ཆོས་ཀྱི་དགའ་སྟོན་ལ་རོལ་བར་བྱས་ཏེ་མཛད་སྒོ་རྒྱལ་ཁའི་ངང་གྲོལ། 

རྩོམ་ཡིག་གཞན།

མཆན་ 0