དགེ་བསྐོས་བསྐོ་བཞག་གྲུབ་རྗེས་རང་ཁོངས་ཁང་ཚན་སོ་སོའི་རྟེན་སྲུང་ཁག་ལ་ཁ་བཏགས་ཇ་ཕུད་ཕུལ་བ་དང་གྲྭ་མང་ལ་དགེ་་ལྡན་བཅའ་ཡིག་ཆེན་མོ་གསར་བསྒྲགས་གནང་ཞིང་། བཀའ་སློབ་ཉིང་བསྡུས་སུ།

9/11/2016 LosellingMonastery མཆན་ 0 སྡེ་ཚན་ :

























 ང་ཚོ་གདན་ས་ཆེན་མོ་འདིར་སློབ་གཉེར་པའི་ཁོར་ཡུག་ངོ་མ་དེ། རིགས་ལམ་གི་ཐོག་ནས་ཡོང་གི་ཡོད་དགོས་པ་ལས། གཏོར་བཅའ་རྔ་རྡུང་གི་ཆོ་ག་ཁོ་ནའི་ལམ་ནས་རིགས་ལམ་རྙེད་མི་སྲིད་ལ། དཔལ་ན་ལེནྜའི་སྟན་པ་དྲི་མ་མེད་པ་ཉིད་འཛིན་མི་ཐུབ་པས། རིགས་ལ་ཉུང་ཕྲི་དང་། བཅོས་བསྒྱུར་གལ་ཆེ་ལ། ང་ཚོས་ཁོར་ཡུག་འདིར་གསར་རྙིང་གི་ལེགས་ཉིས་དག་སྙིགས་དོར་བཅུད་ལེན་བྱེད་དགོས་པ་ལས། དུས་རབས་ཀྱིས་སྒྱུར་པའི་དགོས་མེད་གནའ་སྲོལ་དག་། ཨུ་ཚུགས་བྱས་ན་ཕམ་ཁ་དང་། གྱོང་གུད་ལས་ཅི་ཡང་མི་ཡོང་ལ། མཁས་དབང་དགེ་ཆོས་ཀྱི་དེབ་ཏུ། རྙིང་པ་ཐམས་ཅད་ལྷ་ཡི་སྲོལ་དུ་བསྒྲགས།། གསར་པ་ཐམས་ཅད་བདུད་ཀྱི་འཕྲུལ་དུ་བལྟ།། ཞེས་གསུངས་པ་དེ་དྲན་དུས་དགོས་མེད་རྙིང་སྲོལ་འགའ་བཅོས་བསྒྱུར་གཏོང་དགོས་པ་དེ། ད་ལམ་ཡང་ཡང་ཡིད་ལ་དྲན་དགོས་པའི་རྒྱུ་མཚན་གསུངས། ལྷག་ཏུ་གྲྭ་ས་ཆེན་མོ་འདིར། གཞིས་དགོན་གྱི་རང་གཟུགས་ཚོགས་རྐྱང་རྐྱང་འཚོགས་པའི་རྣམ་པ་མ་ཡིན་པར། ཤེས་ཡོན་གྱི་བསྟི་གནས་ཅིག་གི་རྣམ་པ་བསྟན་ཐུབ་དགོས། དེ་ཡང་འཛམ་གླིང་ཤར་ནུབ་ཀྱི་མཁས་པའི་འགྲོས་དང་བསྟུན་ནས། བར་སྐབས་ཆོས་མཚམས་ཁག་ཏུའང་། གཞུང་ཆེན་བཀའ་པོད་ལྔ་སོགས་ཀྱི་བགྲོ་གླེང་གི་རྣམ་པ་སྟེང་ནས་འབུར་དུ་ཐོན་པར་བྱེད་དགོས། ཐ་ན་དགོན་པའི་གཙུག་ལག་ཁང་དང་། ཁམས་ཚན་སོ་སོའི་ཁྱམས་རའི་སྒོའི་ཁ་བྱང་ཚུན་ཆེད་དུ། སློབ་གཉེར་ཁང་ཞིག་ཡིན་པའི་ཚོར་སྣང་སྦྱིན་པའི་ཁ་བྱང་བཀོད་ན། གཞན་གྱི་ཡིད་ལ་དྭངས་བ་འདྲེན་པ་དང་། སྔོན་གྱི་ན་ལེནྜའི་ཚབ་མཚོན་པ་སོགས་བསྟན་པའི་མིག་རྒྱན་དུ་འགྲོ་བར་ཕན་རླབས་ཆེ་ལ། གཞན་དུ་ཆོ་ག་ཙམ་གྱི་འཚོགས་རྐྱང་རྐྱང་འཚོགས་ས་དང་། གཏོར་འཕེན་རྔ་རྡིང་གི་རྣམ་པ་གཅིག་གི་རང་གཟུགས་འདྲ་བསྟན་ནས་བསྡད་ན། ང་ཚོ་གང་ཡང་མི་ཡོང་ལ། མ་ཟད་བླ་མའི་ཆོས་ལུགས་ཅེས་པའི་མིང་ངན་དེའང་ང་ཚོའི་མགོ་ལ་གཡུགས་སྲིད། དེས་ན་ང་ཚོས་བླ་མའི་ཆོས་ལུགས་སུ་མ་སོང་བར། རིགས་པ་ཡང་དག་གི་སྒོ་ནས་སངས་རྒྱས་ཆོས་ལུགས་ངོ་མ་ཡི་རྣམ་པ་ཞིག་འཆང་དགོས་པ་དེ། ཅང་ནས་གལ་ཆེ་བ་རེད་ཅེས་གསུངས་སོང་།།
སྤྱི་ལོའི༢༠༡༦ ཟླ་བ་ ༩ ཚེས་ ༡༡ དགུང་མོར།

རྩོམ་ཡིག་གཞན།

མཆན་ 0