༧གོང་ས་༧སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོར་ཞབས་སོར་བདེ་བར་འཁོད་གནང་མཛད་པ།

7/01/2016 LosellingMonastery མཆན་ 0 སྡེ་ཚན་ :




དེ་རིང་ཟླ་ ༧ ཕྱི་ཚེས་ ༡ ཉིན་གྱི་སྔ་དྲོ་ཚོུད་ ༩།༣༠ ཐོག་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་ཀར་བར་རྫོང་ནས་མོན་གྷོ་འདོད་གླིང་འབྲས་སྤུངས་དགའ་ལྡན་ཕོ་བྲང་དུ་༸ཞབས་སོར་བདེ་བར་འཁོད་པ་དང་བསྟུན། ཕྱོགས་བཞུགས་སྤྱི་འཐུས་རྣམ་པ་དང་། དགེ་ལུགས་ཡོངས་ཀྱི་རྒྱལ་བའི་བཀའ་དྲིན་རྗེས་དྲན་གྱི་ཚོགས་གཙོ། གདན་ས་ཁག་གི་མཁན་པོ་རྣམ་པ། ས་འཐུས་ཚོགས་གཙོ། མཉམ་འབྲེལ་ཚོགས་གཙོ་བཅས་ཀར་བར་རྫོང་དུ་ཕེབས་བསུར་ཆེད་བཅར་ཞུས་ནས་ཐོག་མར་བླ་སྤྱིར་གནས་གཟིགས་གནང་པ་དང་དེ་རྗེས་བཞུགས་ཁྲིར་ཞབས་སོར་བདེ་བར་འཁོད་མཚམས་དགའ་ལྡན་ཁྲི་རིན་པོ་ཆེ་མཆོག་ནས་མཎ་དྲལ་རྟེན་གསུམ་འདེགས་འབུལ་ཞུས་ཡོད་པ་དང།
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་༸གང་ཉིད་གནས་དེར་ཆུབས་སྒྱུར་མཛད་དོན་གང་ཡིན་སྐོར་བཀའ་བསྩལ་དང་འབྲེལ་དད་ལྡན་སེར་སྐྱ་ཀུན་ལ་འཚམས་འདྲི་གནང་སོང་། ༸གང་ཉིད་མཆོག་གིས་མུ་མཐུད་དཔལ་ནཱ་ལེནྡྲ་ནས་བརྒྱུད་པའི་སེམས་ཁམས་རིག་པ་དང་འབྲེལ་བའི་ཆོས་རྒྱུད་དེ་དག་ལོ་ངོ་སྟོང་ཕྲག་རིང་ང་ཚོ་བོད་པ་ཚོས་མི་རབས་ནས་མི་རབས་བར་རྒྱུན་འཛིན་བྱས་ཡོད་པ་དང་། ད་ཆ་འཛམ་གླིང་འདིར་ང་ཚོའི་ངོས་ནས་ཞབས་འདེགས་བསྒྲུབ་པའི་དུས་ལ་བབ་ཡོད་སྐོར་བཀའ་སྩལ་མཛད་སོང་བ་དང་། ད་དུང་མགོན་པོ་མཆོག་གིས་དེང་སྐབས་ཨ་རིའི་ནང་ལའང་བྱམས་བརྩེའི་ཉམས་ལེན་ཐོག་དོ་སྣང་ཆེན་པོ་བྱེད་བཞིན་པ་མ་ཟད། ལྷག་པར་དུ་ཨ་རིའི་གྲོང་ཁྱེར་གཉིས་ཙམ་གྱི་མིང་ཡང་སྙིང་རྗེའི་གྲོང་ཁྱེར་ཞེས་མིང་བཏགས་ཡོད་པ་དང་། གྲོང་ཁྱེར་དེ་དག་ནང་བྱམས་བརྩེ་དང་འབྲེལ་བའི་བགྲོ་གླེང་དང་དེ་དག་བརྒྱུད་འཁྲུག་རྩོད་རིགས་ཀྱང་ཇི་ཉུང་དུ་སོང་བ་སོགས་དངོས་སུ་ཕན་ཐོགས་བྱུང་སྐོར་ལུང་འདྲེན་དང་འབྲེལ་ཉེ་ལམ་༸གོང་ས་མཆོག་ཨ་རིར་ཕེབས་སྐབས་གྲོང་ཁྱེར་སྤྱི་ཁྱབ་པ་ ༢༠༠ ཙམ་གྱི་ལྷན་འཛོམས་སྐབས་ཁོང་རྣམས་པས་ཀྱང་དེའི་ཐད་ཐུགས་སྣང་གནང་བཞིན་པ་སོགས་ངོ་སྤྲོད་སོགས་མཛད་ཡོད། ལྷག་དོན་༸གང་ཉིད་མཆོག་གིས་ཆོས་ལུགས་དང་མ་འབྲེལ་བའི་བཟང་སྤྱོད་གོང་འཕེལ་གྱི་སློབ་གསོའི་སློབ་དེབ་ཞིག་ཀྱང་རྩོམ་སྒྲིག་བྱེད་བཞིན་པ་དང་ཟླ་ཤས་ནང་གཏན་འབེབས་ཟིན་གྱི་ཡོད་སྐོར་སོགས་བཀའ་སྩལ་གནང་སོང་། གཞན་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་མུ་མཐུད་རྒྱ་ནག་ནང་ནང་པའི་གྲངས་འབོར་དེ་ས་ཡ་ ༤༠ ཙམ་ཡོད་ཅིང། དེང་སྐབས་བོད་རྒྱུད་ནང་བསྟན་ལའང་དོ་སྣང་ཇི་ཆེར་འགྲོ་བཞི་ཡོད་སྟབས། ང་ཚོས་ཕྱི་རང་དབང་ལུང་པར་བཟང་སྤྱོད་དང་འབྲེལ་བའི་ལས་འགུལ་ཞིག་སྤེལ་ཐུབ་ཚེ་རྒྱ་ནག་ནང་གཏན་གཏན་ཤུགས་རྐྱེན་ཐེབས་ངེས་ཡིན་པ་དང་དེའི་ཐོག་ནས་བོད་དོན་ཐོག་ལ་ཡང་ཕན་ཐོགས་ཡོང་གི་རེད་ཅེས་གསུངས་ཡོད་པ་རེད། དེ་རྗེས་༸གོང་ས་མཆོག་གིས་ས་གནས་རྒན་གསོ་ཁང་དང་འཕྲོད་བསྟེན་སྨན་ཁང་གཉིས་ཀྱི་གནས་སྟངས་དང་འབྲེལ་བའི་འཕྲོད་བསྟེན་སྨན་ཁང་ལ་སྨན་པ་མེད་དོན་གང་ཡིན་དང་། ས་གནས་སུ་ཉལ་ཐ་འཐེན་མཁན་ཡོད་མེད་སོགས་ཀྱི་གནད་དོན་མང་དག་ཞིག་གི་ཐད་བཀའ་རྩད་གནང་པར་ས་འགོ་མཆོག་གིས་བཀའ་ལན་ཕུལ་ཡོད་པ་རེད། མཛད་འཆར་ལྟར་ན།སང་ཉིན་ཕྱི་ཚེས་  ༢ ནས་ ༥ བར་གདན་ས་ཆེན་པོ་གསུམ་དང་རྭ་སྟོད་གྲྭ་ཚང་། རྒྱུད་གྲྭ་སྟོད་སྨད་གཉིས། དེ་བཞིན་བཀྲ་ཤིས་ལྷུན་པོ་བཅས་ཀྱི་དགེ་འདུན་པ་ ༦༠ ལྷག་ལ་བསྙེན་རྫོགས་ཀྱི་སྡོམ་པ་འབོགས་ཆོག་མཛད་རྒྱུ་ཡིན་པ་དང་། དེ་བཞིན་ཕྱི་ཚེས་༦ ཉིན་༸སྐུའི་འཁྲུངས་སྐར་འཁེལ་གྱི་ཡོད་སྟབས། དེ་ཉིན་དྲོར་འབྲས་སྤུངས་དགའ་ལྡན་པོ་བྲང་བླ་སྤྱིའི་མདུན་ཐང་དུ་སྲུང་བརྩི་ཞུ་རྒྱུ་དང་འདི་བཞིན་དགེ་ལུགས་ཡོངས་ཀྱི་ངོས་ནས་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་གནང་གི་ཡོད་པ་དང་། དེ་མཚུངས་སུ་མོན་གྷོ་སེར་སྐྱ་མི་མང་ཡོངས་ནས་ཀྱང་འདི་ལོ་མོན་གྷོ་འདོད་རྒུ་གླིང་བོད་མིའི་གཞིས་ཆགས་དབུ་བརྙེས་ནས་ལོ་ངོ་ ༥༠ ཐམ་པ་ཧྲིལ་པོ་འཁོར་བའི་དུས་དྲན་སྲུང་བརྩི་དང་འབྲེལ་༸གོང་ས་མཆོག་ལ་བཀའ་དྲིན་རྗེས་དྲན་གྱི་གསེར་གྱི་གཟེངས་རྟགས་འབུལ་བཞེས་དང་འདི་བཞིན་བརྟན་བཞུགས་རྒྱས་པ་ཞིག་ཀྱང་བསྟར་འབུལ་ཞུ་རྒྱུ་རེད་འདུགདང་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་སེར་སྐྱ་མི་མང་ཡོངས་ནས་བརྟན་བཞུགས་བསྟར་འབུལ་ཞུ་རྒྱུ་དང་།དེ་རྗེས་ཕྱི་ཚེས་ ༧ ཉིན་འབྲས་སྤུངས་བློ་གསལ་གླིང་གི་ཆོས་ར་གསར་པ་དབུ་འབྱེད་རབ་གནས་མཛད་རྒྱུ་སོགས་ཀྱི་མཛད་འཆར་ཁག་ཅིག་ཐུགས་གཏན་ཁེལ་ཡོད་པ་རེད། ༸སྐུའི་འཁྲུངས་སྐར་གྱི་མཛད་སྒོར་༸གང་ཉིད་མཆོག་དབུ་བཞུགས་ཀྱིས་གཙོས་ཀར་ན་ཊ་ཀ་མངའ་སྡེའི་བློན་ཆེན་གཞོན་པ་མཆོག་དང་།  དེ་སྔོན་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཚུགས་རྒྱུར་མཐུན་གྱུར་དང་རྒྱབ་སྐྱོར་ཤུགས་ཆེ་གནང་མཁན་ཀ་ན་ཊ་ཀ་མངའ་སྡེའི་བློན་ཆེན་འདས་པོ་སྐུ་ཞབས་ནི་ཇ་ལིང་གཱ་པ་མཆོག་གི་བཀྲིན་རྗེས་དྲན་ཞུ་ཕྱིར་ཁོང་གི་སྐུ་ཚ་ཞིག་ཀྱང་གདན་ཞུ་གནང་པ་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གསུམ་སོགས་ཕྱི་ནང་གི་སྐུ་མགྲོན་མང་དག་ཞིག་གདན་ཞུ་གནང་ཡོད་པ་རེད་འདུག་ལ།











རྩོམ་ཡིག་གཞན།

མཆན་ 0