གཞུང་ཆེན་ཁག་གི་ངོ་སྤྲོད་རགས་བསྡུས།

1/08/2016 LosellingMonastery མཆན་ 0 སྡེ་ཚན་ :

རྒྱལ་བའི་གསུང་རབ་སྤྱི་དང་། ཁྱད་པར་ཕར་ཕྱིན་ཐེག་པའི་སྐོར། ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་གཙོས་འཕགས་ཡུལ་པཎ་གྲུབ་རྣམས་ཀྱིས་མཛད་པའི་གཞུང་ཆེན་ལྔའི་རྩ་བ་དང་། འགྲེལ་པ། ཡང་འགྲེལ་སོགས་བོད་དུ་འགྱུར་རོ་ཅོག་ལ་རང་རང་གི་དབང་པོ་རྣོ་འབྲིང་ལ་དཔག་སྟེ་ཐོས་བསམ་གནང་གི་ཡོད་ཅིང་། གཙོ་བོ་ནི་རྗེ་ཡབ་སྲས་གསུམ་གྱི་གསུང་གཞིར་བཞག་སྟེ་སློབ་གཉེར་གནང་དགོས་ཤིང་གསུང་རབ་ཀྱི་གཏེར་མཛོད་དེ་དག་ལ་འཇུག་པའི་ལྡེ་མིག་ལྟ་བུ་ནི་མདོ་སྔགས་རབ་འབྱམས་བ་སྨྲ་བ་པཎ་ཆེན་བསོད་ནམས་གྲགས་པ་རྣམ་དཔྱོད་མཆོག་གི་སྡེས་མཛད་པའི་ལེགས་བཤད་རྨད་དུ་བྱུང་བ་པུ་ཏི་བཅུ་བཞི་ཙམ་ཡོད་པ་འདི་ལྟར། རྒྱུད་སྡེ་སྤྱིའི་རྣམ་བཤད།
དཔལ་གསང་བ་འདུས་པའི་བསྐྱེད་རྫོགས་ཀྱི་ཁྲིད་ཡིག ཕར་ཕྱིན་སྤྱི་དོན་ཡུམ་དོན་གསལ་བའི་སྒྲོན་མེ། ཕར་ཕྱིན་མཐའ་དཔྱོད་ཡུམ་དོན་ཡང་གསལ་སྒྲོན་མེ། དབུ་མའི་སྤྱི་དོན་ཟབ་དོན་གསལ་བའི་སྒྲོན་མེ། དབུ་མའི་མཐའ་དཔྱོད་ཟབ་དོན་ཡང་གསལ་སྒྲོན་མེ། འདུལ་བའི་མཐའ་དཔྱོད་ལུང་རིགས་ཉི་མ། མངོན་པ་མཛོད་ཀྱི་སྤྱི་དོན་ཤེས་བྱ་རབ་གསལ། ཚད་མ་རྣམ་འགྲེལ་གྱི་འགྲེལ་པ་རྣམ་ འགྲེལ་དགོངས་པ་རབ་གསལ། བཀའ་གདམས་གསར་རྙིང་གི་ཆོས་འབྱུང་ཡིད་ཀྱི་མཛེས་རྒྱན། འདུལ་བའི་ཆོས་འབྱུང་བསྟན་རྩིས་རིན་ཆེན་ཕྲེང་བ། དེབ་ཐེར་དམར་པོ་གསར་མ། དགེ་ལྡན་ལེགས་བཤད་པད་མ་དཀར་པོའི་ཆུན་པོ་བཅས་ཡོདཔ་ལས་གྲྭ་ཚང་འདི་ཉིད་ཀྱི་སློབ་གཉེར་བ་ཚོས་ཕར་ཕྱིན་སྤྱི་མཐའ་དཔྱོད་གཉིས་དང་། དབུ་མ་སྤྱི་མཐའ་དཔྱོད་གཉིས་། འདུལ་བའི་མཐའ་དཔྱོད། མཛོད་འགྲེལ་ཤེས་བྱ་རབ་གསལ། རྣམ་འགྲེལ་དགོངས་པ་རབ་གསལ་བཅས་གཞུང་ཆེན་བཀའ་པོད་ལྔའི་འགྲེལ་པ་འདི་དག་ལ་སློབ་གཉེར་གནང་གི་ཡོད། དེ་ཡང་ཕར་ཕྱིན་སྤྱི་དོན་ཡུན་དོན་གསལ་བའི་སྒྲོན་མེ་ནི། རྒྱལ་ཚལ་རྗེའི་གསུང་རྣམ་བཤད་སྙིང་པའི་རྒྱན་གྱི་དཀའ་བའི་གནད་མ་ལུས་པ་གསལ་བར་འགྲེལ་ཞིང་མངོན་པར་རྟོགས་པའི་རྒྱན་མདོ་དང་སྦྱར་ནས་དགོངས་པར་རབ་ཏུ་གསལ་བ་དང་སྐབས་དོན་སོ་སོའི་གཞུང་གི་དོན་རྣམས་རྗེ་ཡབ་སྲས་གསུམ་གྱི་གསུང་ཀུན་བཏུས་དང་། མཛོད་དང་། ཉི་སྣང་དང་རྒྱན་སྣང་འགྲེལ་པ་དོན་གསལ་སོགས་ཁུངས་སུ་མཛད་དེ་སྦས་དོན་མངོན་རྟོགས་ཀྱི་རིམ་པ་རྣམས་བདེ་བླག་ཏུ་གསལ་བར་འཆར་བའི་སྒྲོན་མེ་ལྟ་བུ་ཞིག་ཡིན། ཕར་ཕྱིན་མཐའ་དཔྱོད་ཡུན་དོན་ཡང་གསལ་སྒྲོན་མེ་ནི་སྤྱི་དོན་གྱི་སྐབས་ལུང་དང་རིགས་པ་མཐའ་ཡས་པས་མདོ་དང་རྒྱན་གྱི་དགོངས་པ་སྤྱི་ཡི་ཚུལ་དུ་འགྲེལ་པ་རྣམས་ལུང་གི་སྤྲོས་པ་རྒྱ་ཆེ་དོར་ཏེ་དོན་མདོར་བསྡུས་ནས་སྦྱོར་བ་འགོད་ཅིང་རིགས་པའི་ལམ་ནས་དྲངས་ཏེ་དགག་བཞག་སྤོང་གསུམ་གྱི་སྒོ་ནས་ཡུམ་གྱི་སྦས་དོན་མངོན་ན་རྟོགས་ཀྱི་རིམ་པ་སླར་ཡང་གསལ་བར་བྱེད་པའི་སྒྲོན་མེ་ལྟ་བུ་ཡིན།་་དབུ་མའི་སྤྱི་དོན་ཟབ་དོན་གསལ་བའི་སྒྲོན་མེ་ནི། འཇམ་མགོན་རྒྱལ་བ་གཉིས་པའི་གསུང་དབུ་མ་དགོངས་པ་རབ་གསལ་གྱི་དགོངས་དོན་དཀའ་བའི་གནད་མ་ལུས་པ་གསལ་བར་འགྲེལ་ཞིང་ཟབ་མོ་དབུ་མའི་ལམ་གྱི་རིམ་པ་སྤྱི་ཡི་དོན་རྣམས་ལུང་རི་གས་ཀྱིས་བརྒྱན་ཏེ་རབ་ཏུ་གསལ་བར་བྱེད་པའི་སྒྲོན་མེ་ལྟ་བུ་ཡིན། དབུ་མའི་མཐའ་དཔྱོད་ཟབ་དོན་ཡང་གསལ་སྒྲོན་མེ་ནི། སྤྱི་དོན་ལས་དྲངས་པའི་ལུང་འདྲེན་ཅུང་ཟད་བསྡུས་ཤིང་། གཞུང་དོན་སྦྱོར་བ་འགོད་དེ། ཟབ་མོ་དབུ་མའི་དོན་རྣམས་དགག་བཞག་སྤོང་གསུམ་གྱི་སྒོ་ནས་གཏན་ལ་ཕབ་པའི་གཞུང་ཞིག་ཡིན། རྣམ་འགྲེལ་དགོངས་པ་རབ་གསལ་ནི། རྒྱལ་ཚབ་དར་མ་རིན་ཆེན་གྱིས་གསུང་རྣམ་འགྲེལ་ཐར་ལམ་གསལ་བྱེད་ཀྱི་དཀའ་གནད་ཀྱི་མདུད་རྒྱ་མ་ལུས་པ་ལྷུག་པོར་གྲོལ་ཏེ་ཕྱི་རབས་ཀྱི་གདུལ་བྱ་རྣམས་ཀྱི་ལྟ་བའི་མིག་ལྟ་བུ་ཡིན། ཐར་ལམ་གསལ་བྱེད་ལས་གཞུང་དོན་ཆེས་གསལ་བ་ཡོད་པའི་ཐད་ཀྱི་གཞུང་དག་ནི་ས་བཅད་དང་གཞུང་སྦྱོར་ཙམ་ལས་བསྐྱར་ཟློས་ཡང་ཟློས་བྱེད་པའི་དྲི་མ་མེད་པ་ཞིག་ཡིན་ཞིང་ཚད་མ་རྣམ་འགྲེལ་གྱི་དགོངས་པ་ཕྱིན་ཅི་མ་ལོག་པ་གསལ་བར་གཏན་ལ་ཕབ་པའི་ལེགས་བཤད་ཅིག་ཡིན། འདུལ་བའི་མཐའ་དཔྱོད་ལུང་རིགས་ཉི་མ་ནི། རྗེ་དགེ་འདུན་གྲུབ་པས་མཛད་པའི་འདུལ་འགྲེལ་རིན་ཆེན་ཕྲེང་བའི་དགོངས་དོན་གཙོ་བོ་དང་། མཚོ་ཊིཀྐ་སོགས་ཀྱི་དཀའ་གནད་མ་ལུས་པ་གསལ་བའི་བསྟན་བཅོས་ཤིག་ཡིན། མཛོད་འགྲེལ་ཤེས་བྱ་རབ་གསལ་ནི། རྗེ་དགེ་འདུན་གྲུབ་པའི་གསུང་མཛོད་འགྲེལ་ཐར་ལམ་གསལ་བྱེད་དགོངས་པ་གཙོ་བོར་བཟུང་སྟེ་ཁ་གསལ་ཞིང་འཇུག་བདེ་བ་ལུང་རིགས་ཀྱི་སྤྲོས་པ་རྒྱས་ཤིང་ཚིག་ཚོགས་བསྐྱུང་བའི་རྨད་དུ་བྱུང་བའི་ལེགས་བཤད་ཅིག་ཡིན།ཕར་ཕྱིན་རྩ་ཊིཀ་ནི། བསྟན་བཅོས་མངོན་རྟོགས་རྒྱན་གྱི་རྩ་བའི་ཚིག་གི་འགྲེལ་པ་ཁག་གསལ་ལ་དོན་བདེ་བླག་ཏུ་གོ་བར་བྱེད་པའི་གཞུང་སྦྱོར་འགོད་དེ་གཅོད་ཀྱིས་ཟུར་བརྒྱན་བྱས་པའི་གཞུང་ཞིག་ཡིན། སློབ་གཉེར་བ་རྣམས་ཀྱིས་ལོ་གྲངས་ཇི་ཙམ་དུ་སློབ་གཉེར་གནང་སྐོར།
༡༽ བསྡུས་གྲྭ་དང་བློ་རིག་ལོ་གཅིག་དང་ལ་ལ་ལོ་གསུམ་གྱི་བར་དུའང་སློབ་གཉེར་གནང་མཁན་ཡོད།
༢༽ རྟགས་རིགས་འཛིན་གྲྭ་ལོ་གཅིག
༣༽ ཕར་ཕྱིན་ལོ་བདུན།
༤༽ དབུ་མ་ལོ་གསུམ།
༥༽ འདུལ་བ་ལོ་གསུམ།
༦༽ མཛོད་ལོ་གཉིས།
༧༽ དགེ་ལུགས་རྒྱུགས་སྤྲོད་ལོ་དྲུག
དགེ་ལུགས་རྒྱུགས་སྤྲོད་མ་ཕེབས་ན་དེའི་རིང་དཔེ་ཆ་བསྐྱར་གཟིགས་གནང་གི་ཡོད། མདོ་ན་ལོ་ངོ་ཉེར་གསུམ་གྱི་རིང་ལ་སློབ་གཉེར་གནང་གི་ཡོད།

རྩོམ་ཡིག་གཞན།

མཆན་ 0