འཇང་དགུན་ཆོས།

1/20/2016 LosellingMonastery མཆན་ 0 སྡེ་ཚན་ :


འཇང་དགུན་ཆོས་ཞེས་པ་ནི་གནས་མིང་ཆོས་ཐོག་ལ་བཏགས་པ་ཞིག་སྟེ། འཇང་གྲོང་ཚོའི་ཕུར། འཇང་དགོན་པ་ཞེས་པ་ཞིག་ཡོད་པ་དེ་ནི་ལོ་རྒྱུས་ཐོག་གྲགས་པ་ཆེ་ཙམ་ཡིན། སློབ་དཔོན་ཕྱོགས་ཀྱི་གླང་པོའི་ཐོད་ལེ་ཀོར་རྗེ་བཙུན་འཇམ་དཔལ་དབྱངས་ཀྱིས་ནམ་མཁའ་ལ་འཕངས་ཏེ་དགོན་གནས་དེར་ཟག་པར་གྲགས་ཤིང་བྱིན་རླབས་ཀྱི་ཚན་ཁ་ཆེ་བའི་གནས་ཤིག་ཡིན་པས་ས་གནས་དེར་དགུན་དུས་ཀྱི་ཆོས་ཐོག་དེ་ལ་འཇང་དགུན་ཆོས་ཞེས་པ་དང་། ཡང་ལ་ལས་འཇམ་དབྱངས་དགུན་ཆོས་ཞེས་ཀྱང་འབོད་ཀྱི་ཡོད་།
གནས་གཅིག་ཏུ་ཆོས་ཐོག་གཅིག་ལ་མིང་དེ་གཉིས་གང་འབོད་ཀྱང་ཆོག་སྟེ་རྒྱུ་མཚན་ཐ་དད་ཙམ་ལས་ཁྱད་པར་མེད། བོད་ཟླ་བཅུ་གཅིག་ནང་གདན་ས་ཆེན་པོ་གསུམ་གྱི་གྲྭ་ཚང་དྲུག་དང་། སྙེ་ཐང་རྭ་སྟོད་དགོན། འོན་མདའ་རིས་གྲྭ་ཚང་སོགས་མཚན་ཉིད་དར་ཁྱབ་ཆེ་བའི་དབུས་ཁུལ་གྱི་དགོན་སྡེ་ཁག་གི་དགེ་འདུན་སྟོང་ཕྲག་བརྒལ་བ་འཛོམས་ཏེ་གཞུང་ཆེན་བཀའ་པོད་ལྔ་ཡི་ནང་ཚན་ཚད་མ་རྣམ་འགྲེལ་དང་། དེའི་དགོངས་འགྲེལ་ཁག་ལ་གསན་བསམ་དང་བརྒལ་བརྟག་གནང་གི་ཡོད། དེ་ཡང་ཟླ་བ་གཅིག་གི་རིང་ཉིན་རེ་སྲོད་ཆོས་དམ་བཅའ་རེ་དང་། འཛིན་གྲྭའི་དམ་བཅའ་རེ་ཆག་མེད་ཡོད། སྲོད་ཆོས་དམ་བཅའི་སྐབས་གྲྭ་ཚང་ཕན་ཚུན་བར་དམ་བཅའ་འཇོག་རེས་གནང་གི་ཡོད། མཚན་ཕུད་དམ་བཅའ་ཆེན་པོ་གཉིས་ཡོད། དེ་མིན་དཔེ་ཁྲིད་དང་དཔེ ཀློག་དང་རྩོད་པ་བཅས་ཀྱིས་དུས་འདའ་བའི་གསན་བསམ་རྣལ་མ་མཛད་སྲོལ་ཡོད། དེའི་སྐབས་ཀྱི་མང་ཇ་དང་དམ་བཅའ་ཞུ་ས། ཁྲིམས་ཇི་ནོན་བྱེད་སྒོ་ཁག་གི་འགན་གཙོ་ནི་སྙེ་ཐང་རྭ་སྟོད་གྲྭ་ཚང་གིས་གནང་གི་ཡོད། དེ་དང་མཚུངས་པ་འཕགས་ཡུལ་དུ་བྱེས་འབྱོར་སེར་འབྲས་དགའ་གསུམ་དུ་ལོ་རེ་བཞིན་རེས་མོས་ཀྱི་གདན་གསུམ་གྲྭ་ཚང་དྲུག་དང་། རྭ་སྟོད། བཀྲ་ཤིས་ལྷུན་པོ་བཅས་ཀྱི་སློབ་གཉེར་བ་སྟོང་ཕྲག་བརྒལ་བ་འདུ་འཛོམས་ཐོག་ཟླ་བ་གཅིག་གི་རིང་ཉིན་རེ་བཞིན་སྲོད་ཆོས་དམ་བཅའ་དང་འཛིན་གྲྭ་དམ་བཅའ་བཅས་ཆག་མེད་ཡོད། སྲོད་ཆོས་དམ་བཅའི་སྐབས་གྲྭ་ཚང་ཕན་ཚུན་དམ་བཅའ་འཇོག་རེས་སྔ་ནས་རྒྱན་བརྒྱབ་སྟེ་གཏན་འཁེལ་ཟིན་པ་དགོས། མཚན་ཕུད་དམ་བཅའ་གཉིས་ཡོད། དེ་ནི་དཔེར་ན་བློ་གསལ་གླིང་དུ་མཚན་ཕུད་དམ་བཅའ་ཚོགས་ན། སྒོ་་མང་གྲྭ་ཚང་། བྱང་རྩེ་གྲྭ་ཚང་། བྱེས་པ་གྲྭ་ཚང་གསུམ་དམ་བཅའ་དང་། བློ་གསལ་གླིང་། ཤར་རྩེ་གྲྭ་ཚང་། སེར་སྨད་གྲྭ་ཚང་གསུམ་གྱིས་རྟགས་བསལ་གཏོང་དགོས། སྒོ་མང་གྲྭ་ཚང་དུ་མཚན་ཕུད་ཡིན་ན། བློ་གསལ་གླིང་། ཤར་རྩེ་གྲྭ་ཚང་། སེར་སྨད་གྲྭ་ཚང་གསུམ་དམ་བཅའ་དང་གཞན་གསུམ་གྱིས་རྟགས་བསལ་གཏོང་བ་སོགས་སྔོན་གྱི་ཕྱག་སྲོལ་དྲི་མ་མེད་པ་སྐྱོང་བཞིན་པ་དང་། གྲྭ་ཚང་འདི་ཉིད་ཀྱིས་ལོ་ལྟར་སློབ་གཉེར་བ་ལྔ་བརྒྱ་ཙམ་འཇང་དགུན་ཆོས་སུ་རིགས་པའི་དབང་ཕྱུག་རྣམ་གཉིས་ཀྱི་གཞུང་ལ་གུས་རྟག་སྦྱོར་བའི་བརྩོན་འགྲུས་ཀྱིས་སྦྱངས་པ་མི་དམན་པ་གནང་གི་ཡོད། འཇང་དགུན་ཆོས་གྲོལ་རྗེས་གྲྭ་ཚང་འདི་ཉིད་དུ་ཆོས་ཐོག་དེར་ཕེབས་མཁན་གྱི་གྲྭ་པ་རྣམས་ཀྱིས་ལོ་ཕྱི་མའི་དགེ་བཤེས་ལྷ་རམས་པ་རྣམས་དམ་བཅའ་བཞུགས་སྐབས་ཆོས་ཐོག་རྒན་གཉིས་ཡོད། དེ་ནི། ལོ་ཕྱི་མའི་དགེ་བཤེས་ལས་ཐོག་པ་མཚན་ཐོ་རྒན་པ་གཉིས་ཀྱིས་གནང་གི་ཡོད། འཇང་དགུན་ཆོས་མ་ཚུགས་པའི་སྔ་རོལ་ནས་སློབ་གཉེར་བ་རྒྱུགས་སྤྲོད་ཨང་རིམ་བཞིན་དམ་བཅའ་འཇོག་མཁན་འཛིན་གྲྭའི་སྐྱོར་དཔོན་ནས་མཚན་ཐོ་ཆོས་ཐོག་རྒན་ལ་ཕུལ་ནས་རྒྱན་བརྒྱབ་སྟེ་དམ་བཅའ་འཇོག་མཁན་གཏན་འབེབས་གནང་གི་ཡོད། ཆོས་ཐོག་རྒན་གྱིས་འཇང་དགུན་ཆོས་ཕེབས་མཁན་མང་ཉུང་ལ་དཔག་སྟེ་དཔེ་ཁྲིད་རྒན་མང་ཉུང་ཇི་དགོས་གདན་འདྲེན་ཞུ་དགོས།

རྩོམ་ཡིག་གཞན།

མཆན་ 0