ཚོགས་་ལངས་སྐོར།

1/18/2016 LosellingMonastery མཆན་ 0 སྡེ་ཚན་ :





ཚོགས་ལངས་ཞེས་པ་ནི་རྒོལ་སྔ་ཕྱི་གཉིས་ཀྱི་གཞུང་ལུགས་ཆེན་མོའི་དོན་ལ་བརྒལ་ལན་བགྱི་ཚུལ་བྱེ་བྲག་པ་ཞིག་སྟེ་མཁས་མང་འདུས་པ་རྒྱ་མཚོས་ཚོགས་འཚོགས་པའི་དབུས་སུ་རིགས་ལམ་ལ་པ་རྒོལ་སྔ་ཕྱི་གཉིས་ཀྱི་ཆོས་ཀྱི་བརྒལ་བརྟག་གི་རིམ་པ་ཞིག་ཡིན། དེ་ཡང་རྗེ་བདག་ཉིས་ཆེན་པོས་མཁས་གྲུབ་ཐམས་ཅད་མཁྱེན་པ་དང། རྗེད་འཇམ་དབྱངས་ཆོས་རྗེ་གཉིས་ཕར་ཕྱིན་སྐབས་བཞི་པའི་ཚོགས་ལངས་བཞེངས་བཅུག་གནང་མཛད་པ་དང་།
མཁས་གྲུབ་ཐམས་ཅད་མཁྱེན་པ་དང་བྱམས་ཆེན་ཆོས་རྗེ་གཉིས་ཚོགས་ལངས་བཞེངས་བཅུག་གནང་་མཛད་སྐབས་སུ། རྟགས་རྟེན་འབྲེལ་ཇི་ལྟར་བྱུང་ཚུལ། ཚོགས་ལངས་ཀྱི་རྟགས་བསལ་བཏང་ཚུལ་ཇི་ལྟར་བྱུང་བ་ལྟར་སེར་འབྲས་གཉིས་སུ་ཚོགས་ལངས་ཀྱི་སྐབས་ཚུལ་ཅུང་ཟད་མི་འདྲ་བ་ལས་སྤྱིར་གལ་ཆེ་བའི་ཆོས་ཕྱོགས་ཀྱི་བྱེད་སྒོ་ཞིག་ཡིན་པས་ཞྭ་སེར་རིང་ལུགས་པའི་དགོན་སྡེ་ཕལ་ཆེ་བ་ལ་ཡོད་པ་སྤྱིར་མཚུངས་ཡིན། གྲྭ་ཚང་འདི་ཉིད་ཀྱི་ཚོགས་ལངས་ཀྱི་རིམ་པ་ནི་འདི་ལྟར་ཏེ། སྨོན་ལམ་ཆེན་མོ་གྲོལ་ནས་ཚོགས་ལངས་བཞེངས་མཁན་རྣམས་བླ་མ་གཞུང་ལེན་པའི་སར་དམ་བཅའ་ཞུ་དགོས། དེ་ནི་སུ་ལ་གནང་མི་གནང་ནི་བླ་མ་གཞུང་ལེན་པ་རང་ཉིད་ལ་དབང་ཆ་ཆ་ཚང་ཡོད། བླ་སྤྲུལ་དང་དམིགས་བསལ་ཚོགས་ལངས་གནང་དགོས་ཀྱི་རིགས་འོས་བབ་དང་བསྟུན་ནས་གནང་ཆོག་པ་ཡིན། དེ་མིན་དམ་བཅའ་ཞུ་མཁན་རྣམས་རྒྱན་བརྒྱབ་ནས་ཚོགས་ལངས་དངོས་གཞི་་དང་། རོགས་པ་བཅས་ནས་དཔྱིད་ཆོས་དང་པོའི་སྐབས་ནས་རེས་གཟའ་ཉི་མའི་ཁམས་ཚན་དམ་བཅའ་རིམ་པས་བསྐོར་དགོས། སྟོང་ཉིད་ཆོས་རའི་སྐབས་གྲྭ་ཚང་གི་ཆོས་རྭའི་འདུ་ཁང་དུ་འདུས་མང་དབུས་སུ་དམ་བཅའ་བཞག་ནས་གཞུང་གང་གི་ཚོགས་ལངས་ཡིན་པ་དེའི་འཛིན་གྲྭ་དེས་རྟགས་བསལ་གཏོང་དགོས། དེ་བཞིན་དུ་དབྱར་ཆོས་སུ་འབྲས་སྤུངས་ཚོགས་ཆེན་རྡོ་གཅལ་དུ་བློ་གསལ་གླིང་ཚོགས་ལངས་དམ་བཅའ་ལ་སྒོ་མང་ནས་རྟགས་བསལ་གཏོང་དགོས། སྒོ་མང་གི་ཚོགས་ལངས་དམ་བཅའ་ལ་བློ་གསལ་གླིང་གིས་རྟགས་བསལ་གཏོང་དགོས། ཁྱད་པར་དུ་འདུལ་མཛོད་གཉིས་གྲྭ་ཚང་དུ་དམ་བཅའ་སྐབས་མུ་བཞི་ཆེན་མོ་ཟླ་ཤེས་སྔོན་ནས་གྲ་སྒྲིག་བྱས་ཏེ་ཡིག་ཐོག་ཏུ་བཀོད་དགོས། ཆོས་རྭའི་ནང་ཚོགས་ལངས་དམ་བཅའ་ལ་མུ་བཞི་བརྩིར་བཅུག དེའི་ཕྱི་ཉིན་མཁས་མང་བློ་གསལ་བྱེ་བའི་གླིང་གི་འཛིན་དང་པོའི་སར་མུ་བཞི་རྩིས་སྤྲོད་གནང་ནས་ཞིབ་གཤེར་ནན་པོ་བྱས་ཏེ་དབྱར་ཆོས་སྐབས་ཚོགས་ཆེན་དུ་སྒོ་མང་གི་ཚོགས་ལངས་ལ་ཡང་མུ་བཞི་ཆེན་མོ་སྒྲིག་དགོས། སླར་ཡང་ཕྱི་ཉིན་སྒོ་མང་ནས་བློ་གསལ་གླིང་གི་ཚོགས་ལངས་ལ་མུ་བཞི་ཞིག་གཏོང་དགོས། དེ་ནི་འདུལ་མཛོད་གཉིས་ཀ་གཅིག་མཚུངས་ཡིན། བོད་ཟླ་བདུན་པའི་ཚེས་གཅིག་ནས་རིགས་གྲྭ་ཚོགས་ལངས་དངོས་གཞི་དབུ་འཛུགས་དགོས། དང་པོ་ཆོས་འཁོར་ཚོགས་ལངས་དང་། ཚེས་གཉིས་ལ་དགེ་འདུན་ཉི་ཤུ། ཚེས་བརྒྱད་ལ་སྐབས་བཞི་པའི་ཚོགས་ལངས་ཡིན། དེ་ཡང་རྗེ་བདག་ཉིད་ཆེན་པོས་དུས་བཟང་འདི་ཉིད་དུ་མཁས་གྲུབ་རྗེ་དང་རྗེ་འཇམ་དབྱངས་ཆོས་རྗེ་གཉིས་སྐབས་བཞི་པའི་ཚོགས་ལངས་བཞེངས་བཅུག་སྐབས་ལུང་རིགས་ཀྱི་བརྒལ་བརྟག་གིས་མཁས་རྒུའི་ཡིད་ཀྱི་བརྟན་པ་འཕྲོག་པ་དང་། དབུ་ཞྭ་ཕར་ཚུར་གཡུགས་དུས་ཀ་བ་ལ་ཐོགས་རེག་མེད་པ་སོགས་མངོན་པར་རྟོགས་པའི་ཡོན་ཏན་བླ་ན་མཐོ་བའི་རང་རྟགས་ངོ་མཚར་བ་དུ་མས་འདུས་ཚོགས་རྣམས་དད་པའི་ས་ལ་འགོད་པ་དང་། རྗེ་འཇམ་དབྱངས་ཆོས་རྗེའི་དྲུང་དུ་ཀླུ་འབུམ་ཕྲག་གཅིག་གིས་མཇལ་བཅར་ཞུས་པར་བརྟེན། འབྲས་སྤུངས་ཀླུ་འབུམ་དུས་ཆེན་ཞེས་ཡོངས་སུ་གྲགས་པ་འདི་ཉིད་བྱུང་བ་ཡིན། ཚེས་བཅོ་ལྔའི་སེམས་བསྐྱེད་ཚོགས་ལངས་ངེས་པ་ཡིན། གཞན་རྣམས་ངེས་པ་མེད། ཚོགས་ལངས་གུང་ཚིགས་མང་ཇ་ལ་བཞེངས་རྒྱུ་དང་། དེ་ཡང་བླ་མ་གཞུང་ལེན་པས་རབ་འབྱམས་པ་ཞེས་ཆེད་བརྗོད་དང་འབྲེལ་ཚོགས་ལངས་བ་གཉིས་ཀྱི་མཚན་ནས་སྨོས་ཏེ་རིགས་ལམ་ལ་བཞེངས་པར་མཛོད་ཅེས་བརྡ་གནང་བ་དང་། ཚོགས་ལངས་བ་གཉིས། ཞྭ་སེར་བསྣམས་ཏེ་གདོང་གྲལ་གྱི་མཐར་ཕེབས་ནས་ཕྱག་འཚལ་ཏེ་སྨོན་ལམ་མཚམས་སྦྱོར་དང་འབྲེལ་བའི་རྟེན་གཙོ་ཁག་ལ་སྙན་ཤལ་ཕུལ་ཏེ་མཆོད་མཇལ་ཞུས་རྗེས། བླ་མ་གཞུང་ལེན་པའི་མདུན་དུ་འཕྲོས་གཞུང་གསན་དགོས། བླ་མ་གཞུང་ལེན་པའི་འཕྲོས་གཞུང་ཟིན་ པ་དང་། ཚོགས་ལངས་གཞོན་པ་གཡོན་གྲལ་དུ་ཕེབས། ཚོགས་ལངས་བ་རྒན་པས་བླ་མ་གཞུང་ལེན་པ་ལ་འཕྲོས་གཞུང་ཕུལ་ནས་གདོང་གྲལ་གྱི་དཀྱིལ་དུ་བཞེངས་ཏེ། དབྱངས་རྟ་སྙན་པོའི་ངང་མཆོད་བརྗོད་དང་གཞུང་བཤད་གནང་རྗེས། ཚོགས་ལངས་བ་གཞོན་པས་ཁྱབ་འགོ་འཛུགས་ཏེ་བརྒལ་བརྟག་མཛད་དགོས། དུས་ཡུན་ཇི་ཙམ་བཞག་མིན་བླ་མ་གཞུང་ལེན་པས་ཚོད་འཛིན་དགོས། བླ་མ་གཞུང་ལེན་པས་ཚོགས་ལངས་བ་གཞོན་པ་དེའི་མིང་ནས་སྨོས་ཏེ། རིགས་ལམ་དེ་ག་ཡོང་། ཚིག་བཀྲ་དང་མཆོད་དབྱངས་མཛོད་རིགས་ལམ་བ་རྒན་པའི་མཚན་ནས་སྨོས་ཏེ་རིགས་ལམ་མཛོད་ཅེས་གསུང་པ་དང་། དབུ་ཞྭ་བཞེས་ཏེ་དྷི་སྐད་བརྒྱབ་ནས་དབུ་ཞྭ་ཕུད་དེ་ཚིག་བཀྲ་དང་མཆོད་དབྱངས་ཀྱི་མཇུག་ཏུ་ དྷི༔་སྐད་ཤུགས་ཆེན་པོ་རྒྱག་དགོས། ཚོགས་ལངས་བ་རྒན་པས་རྟགས་བསལ་ཁྱབ་འགོ་འཛུགས་ཏེ་བརྒལ་བརྟག་མཛད་རྒྱུ་ཡིན། ཡང་བླ་མ་གཞུང་ལེན་པས་མཚམས་བརྡ་གནང་བ་དང་། ཚིག་བཀྲ་དང་མཆོད་དབྱངས་ཀྱི་མཇུག་ཏུ་དྷི་སྐད་ཤུགས་ཆེན་པོ་རྒྱག་དགོས་ཤིང་ཚོགས་ལངས་ཚར་བ་དང་གྲྭ་མང་ནས་བསྟན་འབར་མ་གསུངས། ཚོགས་ཆེན་ཞལ་ངོ་ནས་ཚོགས་ལངས་གཉིས་ལ་ཁ་དར་རེ་སྒྲོན་གནང་མཛད་དེ་ཚོགས་ཆེན་དུ་མཛད་སྒོ་གྲུབ་པ་དང་། ཁམས་ཚན་ནམ་རང་ཤག་གང་རུང་ཞིག་ཏུ་རྟེན་འབྲེལ་གྱི་མཛད་སྒོ་ཚུགས་ཏེ་འཛིན་གྲྭ་གཅིག་པ་དང་ འབྲེལ་ཡོད་ཁག་ནས་ལེགས་སྐྱེས་དང་མཇལ་དར་ཕུལ། ཚོགས་ལངས་བ་ནང་ཕན་ཚུན་བར་གསོལ་ཚིགས་སྟབས་བདེ་རེ་འབུལ་རེས་གནང་བ་བཅས་སོ།།

རྩོམ་ཡིག་གཞན།

མཆན་ 0