མཁས་མང་བློ་གསལ་གླིང་གི་དགུན་ཆོས་སྐབས་སྲོད་ཆོས་གནང་སྐོར།

1/19/2016 LosellingMonastery མཆན་ 0 སྡེ་ཚན་ :


སྲོད་ཆོས་ནི། གྲྭ་ཚང་འདི་ཉིད་ཀྱི་གལ་ཆེ་བའི་བྱེད་སྒོ་དོན་པོ་ཆེ་ཞིག་ཡིན། དེ་ཡང་སྲོད་ཆོས་ཀྱི་སྐབས་མཁན་རིན་པོ་ཆེ་ནས་ལམ་རིམ་བདེ་ལམ་གྱི་ཉམས་ཁྲིད་གནང་གི་ཡོད། དགོས་དོན་ཡང་སློབ་གཉེར་བ་ཚོས་གཞུ་ཆེན་ཁག་ལ་ཐོས་བསམ་གྱི་ཚེ་ཕྱི་ཤེས་བྱའི་རྣམ་གྲངས་བགྲང་བ། ཐོས་པ་ལྷུར་ལེན། རྩོད་པ་ལྷུར་ལེན་དུ་མ་སོང་བ།
ནང་གི་སེམས་འདུལ་བའི་རིམ་པ་གཙོ་བོར་བྱས་ཏེ་སྒྲུབ་པ་ལྷུར་ལེན་གྱི་ཐོས་བསམ་གནད་དུ་འགྲོ་བའི་ཆེད་དུ་ཡིན། དེ་ཡི་ཚུལ་ཡང་སྐུ་རིམ་ཚུགས་རྗེས་ཆབ་རིལ་ནས་མཁན་རིན་པོ་ཆེ་གདན་འདྲེན་ཞུ་དགོས། དེའི་སྐབས་གྲྭ་མང་གིས་སྐུ་རིམ་གྱི་སྒྲོལ་མ་འདོན་བཞིན་པའི་སྐབས་ ཡིན་པས་མགོ་བོ་དུད་ནས་བཞུགས་པ་ལས་ལངས་མི་དགོས། མཁན་རིན་པོ་ཆེ་བཞུགས་ཁྲིར་འཁོད། སྐུ་རིམ་གྱི་འདོན་པ་ཚར་བ་དང་མཁན་རིན་པོ་ཆེ་ནས་ལམ་རིམ་བདེ་ལམ་འགོ་བཤེས་གཉེན་བསྟེན་ཚུལ་ནས་བཟུང་སྟེ། ས་བཅད་གང་ཞིག་གི་བར་དུ་དལ་བུར་ཐུགས་ཐོག་ནས་ཉམས་ཁྲིད་ཀྱི་ཚུལ་དུ་ལན་གསུམ་གྱི་བར་དུ་གསུང་དགོས། གྲྭ་མང་ནས་ཀྱང་མཁན་རིན་པོ་ཆེའི་གསུང་གི་ཚིག་རིམ་བཞིན་དུ་མོས་བསྒོམས་དང་བདུད་རྩི་འབེབས་སྦྱངས་བྱས་ཏེ་ས་བཅད་སོ་སོའི་སྐབས་ནས་བསྟན་པའི་ལམ་རྣམས་ལ་མཉམ་པར་བཞག་སྟེ་བཞུགས། བླ་མ་གཞུང་ལེན་པས་ཀྱང་། ལམ་རིམ་མཁན་རིན་པོ་ཆེའི་གསུངས་མཚམས་ཀྱི་བར་དུ་ལན་གཅིག་སྐྱོར་དགོས། མཁན་པོ་རིན་པོ་ཆེ་ནས་ཕེབས་ཤིག་གསུངས་ པ་དང་། བླ་སྤྲུལ་དགེ་བཤེས་རྣམས་ཀྱིས། མཁན་རིན་པོ་ཆེ་ལ་དབུ་གཏུགས་ཞུས་ཏེ་འཛིན་དང་པོ་བ་རྣམས་བླ་མ་གཞུང་ལེན་པའི་རྗེས་སུ་ཕེབས་ནས། ལོགས་སུ་དམ་བཅའི་གྲལ་ལྟར་ཚོགས་ཏེ་བླ་མ་གཞུང་ལེན་པས་སླར་ཡང་ལན་གསུམ་གྱི་བར་དུ་སྔར་ལྟར་སྐྱོར་གནང་དགོས། དེ་ནས་མཁན་རིན་པོ་ཆེ་ནས་འཛིན་གྲྭ་སོ་སོའི་གཞུང་ཚན་བརྩི་བཞག་གནང་ནས། འཛིན་གྲྭ་སོ་སོ་དམ་བཅའི་གྲལ་ལྟར་ཚོགས་ཏེ། དགེ་སྐོས་ནས་གཟན་བརྡ་གནང་རིམ་བཞིན་འཛིན་གྲྭའི་སྐྱོར་དཔོན་གྱིས་དབུ་སྐུལ་གནང་བའི་སེམས་བསྐྱེད་པ་ནི་གཞན་དོན་ཕྱིར་ཞེས་སོགས་དབྱངས་རྟ་སྙན་པོ་གཏོང་བཞིན་ཆོས་རའི་རྒྱལ་སྒོ་ནས་ཕྱིར་ཕེབས་ཏེ་གཡས་སྐོར་གྱིས་རང་རང་གི་ཤག་ཏུ་ཕེབས་ཆོག དེ་ཡང་དགོང་མོ་ཆུ་ཚོད་དང་པོ་ དང་གཉིས་པ་ཡན་མན་བར་དུ་འགོར་གྱི་ཡོད། དེ་ལྟ་བུའི་གལ་འགངས་ཆེ་བའི་འཆད་ཉན་གྱི་ཚུལ་འདི་ནི་ཇེ་རྒྱས་ཇེ་བཟང་དུ་བཏང་བ་ལས་ཅུང་ཟད་ཀྱང་ཉམས་པ་མེད་པ་མཛད་གལ་ཆེ་བའི་བྱེད་སྒོ་ཞིག་ཡིན།

རྩོམ་ཡིག་གཞན།

མཆན་ 0